ОБ АВТОРЕ

 

Скончыў Ліцэй пры БДУ і Інстытут журналістыкі. Працаваў у газетах “Комсомольская правда “в Беларуси” і “Звязда”.

Спецыялізаваўся на журналісцкіх расследаваннях і артыкулах.

Сёння ўваходзіць у штат “Еўрарадыё”, дзе спецыялізуецца на рэпартажах. 

Вы здесь

На адзін аўтарскі матэрыял – чарга з перадрукоўшчыкаў

Закошт чаго сёння  развіваюцца незалежныя беларускія медыя-праекты?

Абыходзяцца уласнымі матэрыяламі не заўсёды. Часта артыкулы-навіны перадрукоўваюцца, пры гэтым не заўсёды карэктна.  Правядзем найпрасцейшае назіранне.

Трэцяга верасня на сайце TUT.BY з’яўляецца матэрыял пра Touareg за 587 мільёнаў рублёў для старшыні Ельскага райвыканкама. Інфармацыйнае паведамленне Уладзіміра Чудзянцова замацавана каментаром і фотадоказам. Эксклюзіў.

Науральна, што гэтай інфармацыяй скарыстаюцца і іншыя медыя. Пытанне як: раскруцяць навіну далей ці перадрукуюць?

Глядзім, як перамалоў матэрыял TUT.BY беларускі інфармацыйны рынак. У той жа дзень па гарачых слядах “Народная воля” рыхтуе сваю інфармацыйную заметку па матывах TUT.BY. Пры гэтым падаецца прамая спасылка на першакрыніцу.

Проста перадрукоўвае навіну TUT.BY, даючы прамую спасылку на першакрыніцу, у гэты ж дзень “Белорусский партизан”.

На наступны дзень, 4 верасня, “Наша ніва” змяшчае гэты ж тэкст пра Touareg. Пры гэтым пазначае першакрыніцу (TUT.BY), прапісвае імя і прозвішча аўтара, дае прамая спасылка на матэрыял.  Акрамя таго“НН” праводзіць і сваё даследаванні ў сеціве, знаходзіць інтэрв’ю старшыні райвыканкама, для якога шукалі Touareg, у абласной газеце. Праўда, па прачытанні інфармацыі ў версіі “НН” складаецца ўражанне, што адзіны аўтар усяго тэкста - той жа Уладзімір Чудзянцоў. А раптам дапісалі непраўдзіва, прэтэнзіі да Уладзіміра? Аднак ў плане карэктнасці перадруку “Наша ніва”, як на маю думку, нават і перастаралася.   

“Еўрарадё” дараскруціла гэтую ж тэму, падрыхтаваўшы матэрыял “Колькі кашуе службовае аўто для чыноўнікаў?” Журналістка звязалася з Ельскім райвыканкамам і яшчэ чатырма крыніцамі, каб зрабіць агляд па аўтамабілях для віп-чыноўнікаў.  

На наступны дзень сайт “Хартыя 97” цалкам перадрукоўвае матэрыял “Еўрарадыё”, мяняючы загаловак і лід.  Спасылка на першакрыніцу (у дадзеным выпадку “Еўрарадыё”) адна і вядзе не на матэрыял, а на галоўную старонку радыё. Да таго ж у лідэр-абзацы сказана, што “журналісты даведаліся, колькі каштуе службовае аўто для чыноўнікаў”. Пры гэтым не зразумела, якія канкрэтна журналісты. І ў звычайнага чытача складваецца ўражанне, што даведаліся супрацоўнікі “Хартыі”, а не карэспандэнтка “Еўрарадыё” Тамара Савіч.

Гэта прывяло да таго, што праект “Беларусский репортер”, які наступным стаў у чаргу на перадрук, змясціў у сябе той самы тэкст са спасылкай на “Хартыю 97” як першакрыніцу.

З-за некарэктных перадрукаў “Белорусский репортер” прыпісаў аўтарства тым, хто не пісаў.

Сайт “Тут і цяпер” ужо 6 верасня па-свойму асвяціў тэму з аўтамабілямі для віп-чыноўнікаў. Гэты матэрыял перадрукавалі “Салідарнасць”  і  “Брестская газета”. На маю думку, гэта самыя карэктныя і паважныя да працы калегаў перадрукі. У абодвух выпадках тэкст пададзены часткова, даюцца спасылкі на сайт першакрыніцы, дзе можна пачытаць поўную версію матэрыяла.

Прыклад карэктна перадрукаванага матэрыяла. Тэкст пададзены не цалкам, зроблена прамая спасылка на матэрыял, пазначаны аўтар і СМІ, якое падрыхтавала матэрыял.

Па выніках гэтага агляду бачым, што навіной пра Touareg для старшыні Ельскага райвыканкама зацікавіўся цэлы шэраг СМІ. Самастойна раскруціць гэту тэму ўзяліся “Еўрарадыё” і “Тут і цяпер” (улічваем, натуральна, і эксклюзіўны матэрыял TUT.BY). Шэсць СМІ (больш за палову) перапісалі інфармацыю “па матывах” ці проста перадрукавалі тэму пра Touareg.  

Так і выходзіць, што адзін рыхтуе матэрыял, два – чакаюць, каб ім ускарыстацца. Такія рэаліі беларускай інфармацыйнай медыяпрасторы. Некаторыя медыя перадрукоўваюць тэксты без наўпроставай спасылкі на першакрыніцу і без пазначэння аўтара. Лічы – крадуць.

Аднак працэдуры ці інструкцыі, як правільна перадрукоўваць чужыя тэксты, беларускія незалежныя журналісты пакуль не склалалі. І, на дзіва, пытанне па-сапраўднаму шырока пакуль не падымалася.  

Ад рэдакцыі.

А што думаеце вы, паважаныя чытачы, наконт перадруковак у Сеціве. Ці варта шукаць першакрыніцу інфармацыі? Ці ёсць выпадкі, калі перапісванне загалоўкаў і лідаў можна апраўдаць? Ці ёсць неабходнасць раз і назаўсёды забараніць медыя капіпаст чужога кантэнту? Прымайце ўдзел у нашым апытанні на галоўнай старонцы сайту.

Оценить материал:
Голосов еще нет
распечатать Обсудить в: