Вы здесь

Вышэйшы гаспадарчы суд адхіліў заяву Логвінава і стаў на бок Міністэрства інфармацыі

Слуханні па заяве выдавецтва “Логвінаў” аб вяртанні ліцэнзіі прайшлі ў панядзелак, 18 лістапада, у Вышэйшым гаспадарчым судзе Беларусі.

Як паведамляе прэс-служба ГА “Беларуская асацыяцыя журналістаў”, працэс вяла суддзя Таццяна Праташчык. Яшчэ да пачатку суда яна запатрабавала ва ўсіх трох дзясяткаў прысутных пашпарты. Дадзеныя ўсіх прысутных перапісалі, просячы кожнага назваць сябе і адказаць на пытанне, чаму яны прыйшлі ў суд.

У якасці сведкі ў судзе выступіла фатограф Юлія Дарашкевіч, якая распавяла пра конкурс “Прэс-фота Беларусі” і яго аўтарытэтнае журы, а таксама выдадзеныя выдавецтвам “Логвінаў” альбомы. Юлія падкрэсліла, што большасць надрукаваных у альбоме фотаздымкаў раней ужо публікаваліся ў афіцыйна зарэгістраваных у Беларусі сродках масавай інфармацыі, альбом абсалютна легальна ўвозіўся на тэрыторыю Беларусі больш года прадаваўся ў многіх мінскіх кнігарнях, дзе да яго не ўзнікала ніякіх прэтэнзій.

У якасці прадстаўніка Ігара Логвінава ў судзе выступаў намеснік старшыні БАЖ, юрыст Андрэй Бастунец, які падкрэсліў, што пазбаўленне Логвінава ліцэнзіі парушае правы чытачоў, а таксама, што рашэнне Міністэрства інфармацыі пазбавіць выдавецтва ліцэнзіі пярэчыць Канстытуцыі і міжнародным абавязкам Беларусі.

Прэс-служба БАЖ нагадвае, што прыватнае выдавецтва “Логвінаў” атрымала ад Міністэрства інфармацыі афіцыйнае паведамленне пра пазбаўленне ліцэнзіі на права ажыццяўляць выдавецкую дзейнасць у верасні бягучага года. Ліцэнзію адклікалі па рашэнні калегіі міністэрства “ў сувязі з дапушчанымі грубымі парушэннямі заканадаўства аб ліцэнзаванні”. Гаворка ішла пра выпуск альбома “Прэс-фота Беларусі 2011”, які суд Ашмянскага раёна прызнаў экстрэмісцкім 18 красавіка 2013 года. Выдавецтва "Логвінаў" выступала выдаўцом альбома”.

23 кастрычніка выдавецтва “Логвінаў” накіравала ў Вышэйшы гаспадарчы суд заяву аб прызнанні несапраўдным загаду Мінінфармацыі аб спыненні дзеяння ліцэнзіі на выдавецкую дзейнасць.

З патрабаваннем аднавіць ліцэнзію да Міністэрства інфармацыі Беларусі таксама ўжо звярнуліся сотні пісьменнікаў з усяго свету, журналісцкія іпісьменніцкія арганізацыі і творчыя саюзы. Усе яны звяртаюць увагу на выключнасць выдавецтва, якое падтрымлівала і друкавала творы вельмі шырокага кола аўтараў.

Фота Барыса Гарэцкага, baj.by

Оценить материал: распечатать Обсудить в: